XII Encontro coa Arte: creación e convivencia artistica con Carlos Casares como protagonista

Despois de tres intensas xornadas, caracterizadas por unhas temperaturas anormalmente altas, o Encontro coa Arte: Lembrando a Carlos Casares chegou á súa fin. A XII edición desta actividade de dinamización cultural e artística, que ven celebrándose ininterrompidamente dende 2006, reuniu en Brión a 25 artistas plásticos procedentes de diferentes puntos da xeografía nacional. Os creadores participaron en diferentes actividades, destacando a inauguración da exposición das obras do X Encontro e os obradoiros de pintura do natural que tiveron lugar en Ons, na contorna do Río Pego e na Carballeira de Santa Minia.

- Inauguración da mostra do X Encontro coa Arte: Lembrando a Manuel María

O alcalde de Brión, José Luís García, inaugurou na noite do venres 16 de xuño unha mostra de pintura composta polas 36 obras doadas ao Concello de Brión polos artistas participantes no "X Encontro coa arte: lembrando a Manuel María", celebrado en xuño de 2015. Unha selección de pinturas que poderá visitarse libremente na sala municipal de exposicións de Brión ata mediados de xullo.

O pintor Xosé Vázquez Castro, comisario da exposición e do "XII Encontro coa Arte: Lembrando a Carlos Casares" que se celebrou durante a fin de semana, agradeceu a colaboración do Concello de Brión nestes eventos culturais pois "hai que conservar a cultura, que é o que asenta un pobo. Sen cultura, medraremos na ignorancia". Así mesmo, agradeceu aos artistas "a xenerosidade ao doar unhas obras que pasan a formar parte da pinacoteca do Concello de Brión, unha colección que xa pasa das cincocentas obras".

Un punto no que coincidiu o coordinador dos encontros e desta exposición, Alberto �lvarez, quen apuntou que "esas obras forman parte do patrimonio artístico que Brión atesoura, un legado do Concello de Brión aos seus veciños". E é que, como asegurou Vázquez Castro, "doce anos dan para moito e configuramos unha familia de artista que, a principios de cada mes de xuño, converten a Brión no centro neurálxico para os artistas e os amantes das artes plásticas".

O alcalde brionés foi o encargado de dar a benvida aos artistas participantes nos XII Encontros coa Arte e de inaugurar a exposición dos Encontros de 2015. Aos primeiros citoulles un artigo de Carlos Casares sobre a literatura e o oficio de escritor, para dicirlles que "estou convencido de que vós sodes eses mestres dos que falaba Casares. E dende aquí convido á veciñanza de Brión a que faga caso do que dicía o mestre ourensán e participe nas actividades que organizamos nestes Encontros coa Arte, que teña ese contacto convosco para aprender de todos vós".

Así mesmo, recitou o poema "Galicia", do libro "Os soños na gaiola" de Manuel María para pedirlles que gocen "destes tres días connosco, gozade dese Brión que ides volver ver e, cando atopedes ese Brión que está en todos vós, ese Brión que vai nos vosos sentimentos... nós estaremos encantados de que o compartades connosco a través da vosa arte". O acto pechouse cun concerto da cantautora ferrolá Paloma Suanzes.

- Obradoiros de pintura do natural ao aire libre

Durante a mañá do sábado 17 de xuño, os 25 artistas participantes no encontro realizaron unha sesión de pintura ao natural nas beiras do río Pego. O bo tempo fixo que coincidiran con numerosos veciños e veciñas que cada día percorren esta área natural brionesa, así como con múltiples familias que estaban de festa na parroquia. Pola contra, as altas temperaturas condicionaron a forma de pintar dos propios autores, que en ocasións tiveron dificultades coa aplicación das cores, en especial os acuarelistas.

Os obradoiros de pintura repetíronse na mañá do domingo na Carballeira de Santa Minia, coincidindo cun concurso de debuxo e pintura dirixido a rapaces e rapazas de 4 a 17 anos. Os participantes, divididos en tres categorías, optaron a vales de agasallo para libros, xogos ou material escolar. As técnicas empregadas, o material e a temática foron totalmente libres.

Entre os artistas participante no Encontro deste ano figuraron Alba Roqueta, Antón Sobral, Antón X. Díaz- Caxoto, Beatriz Ansede, Carmen Hermo, Chelo Rodríguez, Enrique Ochotorena, Frutos Casado de Lucas, Isabel Pintado, Javier del Valle, José A. Regidor, José Galarzo, José Mª Ysmer, Laureano Vidal, Luís Romero, Manuel Méndez, María Manuela, María Xesús Díaz, Paco Casal, Rafael Arroyo, Ricardo de Arce, Ricardo Rilo, Veiras Manteiga, Xosé Vázquez Castro e Xosé Vizoso.

A todos eles, grazas polo enorme esforzo creativo asumido durante estas xornadas, sen dúbida froito dun compromiso inquebrantable coa difusión dos valores das belas artes entre a cidadanía; algo que tamén comparten institucións coma o Concello de Brión, patrocinador deste evento.

Galería de imaxes do Encontro coa Arte, lembrando a Carlos Casares