Infobrion Correo Electrónico
Imaxes Imaxes
Separador
II Encontro coa Arte-Trobada dArt
 [+]
Sons
- Non hai
Videos
- Non hai
Info Relacionada
- Non hai
Foros Relacionados
- Non hai

II Encontro coa Arte-Trobada d´Art: un intercambio artístico entre Cataluña e Galicia

Infobrion.com

Despois de tres intensas xornadas de creación e convivencia, os artistas do "II Encontro coa Arte - Trobada d´Art: De l´Empordà a Galicia" recolleron os lenzos e cabaletes cos que durante a fin de semana pintaron en diferentes espazos públicos de Brión.

Os obradoiros de pintura do natural que se celebraron no Paseo do Río Pego e na Carballeira de Santa Minia remataron, pero a obra destes pintores e escultores poderá contemplarse ata o vindeiro 22 de xullo na Sala de Exposicións Municipal. Neste espazo de arte, os artistas cataláns Antonio Marqués, Alba Roqueta, Alfredo Juárez, Carles Bros, Emili Armengol, Joan Rasset, Josep Miralles, Lluis Roura, Pep Camps e Quim Ros expoñen xunto aos creadores galegos Antón Caxoto, Beatriz Ansede, Carmen Hermo, Chelo Rodríguez, Isabel Pintado, Laureano Vidal, Luís Romero, Maica Alonso, María Xesús Díaz, Rebeca Ponte, Ricardo Rilo, Tino Canicoba, Veiras Manteiga, Xosé Vizoso e X. Vázquez Castro. No Encontro tamén participaron convidados pintores doutras procedencias, como o donostiarra Enrique Ochotorena ou o valenciano José Galarzo.

O Encontro iniciouse o venres no Hotel Balneario de Compostela (O Tremo-Os Ánxeles), coa inauguración da exposición da obra doada polos artistas participantes no "I Encontro coa Arte-Trobada d´Art celebrado en 2014. O sábado, a veciñanza puido asistir no Paseo do Río Pego a primeira xornada de pintura do natural, uns obradoiros de creación ao vivo que se prolongaron dende a mañá ata as seis da tarde.

Pouco despois das oito do serán, comezou no espazo multiusos do centro Social Polivalente o concerto do grupo "Lulavai", un exquisito e emotivo recital de arpa a cargo das catro magníficas intérpretes que presentaron o seu último disco "Lémbrame un soño". Ás 21:30 os artistas participaron na inauguración da exposición do "II Encontro coa Arte - Trobada d´Art: De l´Empordà a Galicia", un acto presidido por Xosé Luís García, alcalde Brión, e o conselleiro de Cultura de Castell-Platja d´Aro, Lluis Pujol. Ao evento asistiu o pintor José María Barreiro, que amablemente doou unha das súas obras como agasallo institucional que foi entregado ás autoridades catalás.

O domingo as xornadas remataron co segundo obradoiro de pintura do natural, que se desenvolveu na entorna da Carballeira de Santa Minia. Neste espazo, os creadores pintaron dende primeira hora da mañá, ofrecendo ao público unha oportunidade única para velos desenvolver o seu traballo en vivo.

A actividade deste ano foi unha edición especial dos habituais Encontros coa Arte, unhas xornadas de intercambio, convivencia e creación artísticas que dende 2006 promoven as artes plásticas entre a cidadanía ao tempo que homenaxean a unha figura das nosas letras. En 2013 asinouse un convenio de colaboración coa localidade de Castell-Platja d´Aro polo que alternativamente se celebraron dende esa data xornadas e exposicións de arte en ámbolos municipios.

Envíalla
© 2006. Infobrion.com    |
Proxecto elaborado polo grupo de investigación Gis-T en colaboración co grupo Novos Medios da Universidade de Santiago de Compostela.
Patrocinio económico do Ministerio de Ciencia y Tecnología e programa PRODER-II. Proxecto SINDUR Sociedade da Información e Desenvolvemento Urbano-Rexional (SEC-2002/01874)
Coa colaboración de:     |
Unión EuropeaMinisterio de Educación y CienciaMinisterio de Agricultura Pesca y AlimentaciónXunta de GaliciaFondo Galego de Garantía AgrariaAgaderConcello de BrionFundación Germán Sánchez RuipérezUniversidade de Santiago de Compostela