Celebrouse en Brión a tradicional festa do Magosto

Novembro despediuse en Brión coa celebración dun Magosto tradicional aberto á participación de toda a cidadanía. Unha festa onde o froito do outono por excelencia, as castañas, foron protagonistas unha vez máis xunto ao chocolate e os churros. Unha tradición que no noso concello se celebra na privilexiada contorna da Carballeira de Santa Minia.

O serán festivo iniciouse arredor das 19:00 h.; aínda que dende primeiras horas da tarde, os preparativos das festa inundaron co recendo a castañas asadas, churros e chocolate morno a Carballeira de Santa Minia, onde se ergueu para a ocasión unha carpa para que a numerosa veciñanza que asistiu ao evento puidera resgardarse das posibles inclemencias do clima outonal. Como en anos anteriores, foron moitas as persoas que se concentraron arredor dos puntos onde se distribuíron castañas, chocolate morno e churros, ademais doutras bebidas frías para acompañar a merendada.

O acompañamento musical estivo a cargo das Escolas Musicais de Baile e Música Tradicional de Brión, que amenizaron o Magosto executando varias pezas de música tradicional do seu amplo repertorio.

Galería de imaxes do evento